[martedi, le 31 julio 2018]

Satellites de spionage ha detegite nove signos de activitat al sito nord-corean que fabricava le prime missiles intercontinental del pais, secundo un fonte administrative american de alte rango.

Photos e observationes infrarubie monstra vehiculos entrante e sortiente del sito in Sanumdong, ma il non es clar quanto avantiate pote esser alcun construction de nove missiles.

Le functionario american parlava anonymemente al agentia de pressa Reuters post que The Washington Post reportava que un o duo nove missiles de combustibiles liquide semblava esser in construction.

Un camion e un remulco, similar a los usate previemente por transportar missiles, era vidite in un photo satellite, secundo le official.

Nonobstante le remulco era coperite, in consequentia on non pote saper si illo transportava alcun cosa.

Le sito de Sanumdong, al bordo del capital Pyongyang, previemente produceva duo missiles Hwasong-15, le missiles nord-corean del plus longe distantia de tiro, que secundo expertos poterea attinger le Statos Unite.

Illos era provate por le prime vice in novembre 2017.

Suppositemente, le imagine satellite monstra alsi duo nove edificios, conforme a un tweet de Jeffrey Lewis del blog de actualitates Arms Control Wonk.

Le Casa Blanc declarava que illo non sole commentar sur questiones de information governamental.

Le Secretario de Stato american Mike Pompeo diceva al comitate de relationes estranie del Senato del Statos Unite, le septimana passate, que le Nord continuava producer combustibile por armas nucleari, ma ille mateneva que le administration Trump continuava facer progressos.

Reportos del septimana passate suggereva que un sito nord-corean distincte, usate por disveloppar motores de missiles, dismantellava su installationes.

Iste evaluation de un panel de expertos se basava alsi sur imagines satellite.

Le plus recente inquietudes reguardante le ambitiones armamental de Kim Jong-Un veni post le summitat multo attendite inter le chef de Stato nord-corean e Donald Trump, le mense passate.

Post iste incontro, le presidente american declarava que Corea del Nord non era plus un menacia nucleari e il habeva un optimismo prudente que le Stato diffidente poterea cessar su programma de creation de missiles.

Kim Jong-Un diceva que ille aspirarea a cessar su programma nucleari ma donava nulle detalio sur como isto poterea evenir.

Le eventos ulterior contrasta mal con le surrisos e prisas de manos del summitat singapurian.

Corea del Nord diceva que le negotiationes con Senior Pompeo durante su curte visita in Pyongyang, al comencio de julio, era "regrettabile".

Illo accusava le Statos Unite de haber un "mentalitat de gangster" e que lor demandas "poterea incommodar [lor] voluntat de denuclearisation que usque alora era firme".

fonte

Retour à l'accueil